“Markaziy va Janubiy Osiyo: mintaqaviy va mintaqalararo munosabatlarning zamonaviy holati” mavzusida Respublika ilmiy-amaliy konferensiyasi o‘tkazildi

Jahon iqtisodiyoti va diplomatiya universitetida “Markaziy va Janubiy Osiyo: mintaqaviy va mintaqalararo munosabatlarning zamonaviy holati” mavzusida, markaziy va Janubiy Osiyoning zamonaviy xalqaro munosabatlardagi roli, shuningdek mintaqalararo hamkorlikning istiqbollariga bag’ishlangan Respublika ilmiy-amaliy anjumani tashkil etildi.

Tadbirda O‘zbekiston Respublikasi Tashqi ishlar vazirligi, Jahon iqtisodiyoti va diplomatiya universiteti, O‘zbekiston Respublikasi Qurolli kuchlar akademiyasi, Strategik tahlil va istiqbolni belgilash oliy maktabi, Toshkent davlat sharqshunoslik universiteti, FA O‘zbekistonning eng yangi tarixi muvofiqlash-uslubiy markazi va boshqa yetakchi axborot-tahliliy markazlari va OTMlari vakillari va ekspertlari ma’ruzalar bilan qatnashdi.

Ekspertlarning chiqishlari va munozaralari davomida mintaqaviy va mintaqalararo xavfsizlik va barqarorlikni mustahkamlash, Markaziy va Janubiy Osiyo davlatlari va mintaqadan tashqari aktorlarning davom etayotgan jarayonlardagi ishtiroki masalalarini muhokama qilishga alohida o‘rin ajratildi. Konferensiya Markaziy va Janubiy Osiyo davlatlari o‘rtasidagi hamkorlikning hozirgi holati, mintaqalar o‘rtasidagi transport-logistika, infratuzilma, energetika va savdo-iqtisodiy sohalardagi aloqalarni rivojlantirish bo'yicha fikr almashishga imkon berdi. Jumladan, tadbir ishtirokchilari O‘zbekistonning Markaziy va Janubiy Osiyodagi roli tobora ortib borayotgani, rasmiy Toshkentning mintaqaviy o'zgarishlarga qo‘shimcha turtki beradigan yangi mintaqaviy siyosati haqida ham to'xtalib o'tdilar.

Natijalarga ko'ra, bunday tadbirlarning fanlararo hamkorlikni rivojlantirish uchun ham, keng jamoatchilikka O'zbekistonning ochiq, amaliy va yangilangan tashqi siyosat olib borishga qaratilgan sa'y-harakatlarini yetkazish uchun muhimligi qayd etildi, uni Markaziy va Janubiy Osiyo davlatlarining ishonchli sherigi sifatida namoyon etadi.

Tadbir ishtirokchilarining ijobiy taqrizdan o’tgan maqolalari anjuman materiallari to‘plamida chop etiladi.