JIDUda katta sport bayrami oʻtkazildi

2019 yil 24 aprel kuni Jahon  iqtisodiyoti va diplomatiya universitetida “Yevropa tillari haftaligi” doirasida talabalar va universitet qoshidagi akademik litsey oʻquvchilari ishtirokidagi anʼanaviy “Yevropa futboli” turnirining final uchrashuvi boʻlib oʻtdi.

Katta qiziqish uygʻotgan xalqaro musobaqaning yakuniy bosqichiga maxsus taklif qilingan futbol boʻyicha Xalqaro toifadagi hakam, Oʻzbekistonda xizmat koʻrsatgan yoshlar murabbiysi Axbor Imomxoʻjayev hamda FIFA referisi, besh marta Osiyoning eng yaxshi hakami unvoniga erishgan Ravshan Ermatov hakamlik qildilar.

Koʻplab tamoshabinlarning qarsaklari ostida ramziy xalqaro oʻyin ishtirokchilari – JIDU va uning qoshidagi Litsey talabalari “Borusiya” (Dortmund) va “Bavariya” (Myunxen) jamoalarining ayni ularga xos sport kiyimlarida maydonga tushdilar.

Musobaqani Oʻzbekiston davlat madhiyasi yangragach, “Paxtakor” komandasining mashhur futbol faxriysi Ahmad Ubaydullayev birinchi toʻpni tepish bilan boshlab berdi. “Borusiya” jamoasi sardori D.Baxodirov boshchiligidagi oʻyinchilar – I.Ibragimov, V.Mirzaraximov, M.Jumagulov, O.Abdulxakov, Sh.Sirojov “Bavariya” jamoasi: S.Joʻraqoʻziyev boshchiligidagi S.Toʻrayev, Sh.Jumanov, B.Aymuratov, B.Joniyev, J.Kadirovlarga qarshi darhol hujum boshladilar. Tinimsiz kurash 3:1 hisob bilan yakunlanib, “Borusiya” jamoasi foydasiga hal boʻldi. Gʻoliblar va turnir ishtirokchilarini Axbor Imomxoʻjayev, Ravshan Ermatov, Oʻzbekiston futboli faxriylari Vyacheslav Soloxo, Ahmad Ubaydullayev maxsus kubok hamda medallar bilan taqdirladilar.

Mazkur tadbir doirasida Oʻzbekiston jismoniy madaniyatining yirik arboblaridan hisoblangan Axbor Imomxoʻjayev tavalludining 1000 oyligi tantanali nishonlandi. Moʻtabar ustozni respublikamizda sport taraqqiyotiga katta hissa qoʻshib kelayogan taniqli tashkilotchilardan Shavkat Toʻlaganov, Oʻzbekistonda xizmat koʻrsatgan artist Kozim Qayumov, JIDU birinchi prorektori Matyoqub Baqoyev va boshqalar qizg'in tabriklab, unga eng samimiy istaklarini bildirdilar. Uchrashuvda tajribali futbol treneri Baxrom Gʻafurov, sport jurnalisti Salohiddin Mahmudov, “Oltin qalam” Respublika tanlovi laureati, taniqli shoira Zulfiya Moʻminova, tarixchi olim, shoir va jamoat arbobi Omonullox Mutal va boshqalar ishtirok etdilar.

Sport bayrami doirasida mehmonlar va universitet talaba-yoshlari orasida Oʻzbekistonda jismoniy madaniyat taraqqiyotida boʻlayotgan katta oʻzgarishlar va hal qilinishi lozim boʻlgan muammolari boʻyicha ham ochiq muloqot boʻlib oʻtdi. Taniqli sport vakillari talabalarning koʻplab savollariga javob berdilar. 

Ochiq muloqotda 9 may – “Xotira va qadrlash kuni” oldidan bundan qirq yil oldin aviahalokatga uchragan “Paxtakor” jamoasi futbolchilari eslanib, ularning yorqin xotirasi xalqimiz qalbida abadiy saqlanishi alohida qayd etildi. Shoir Omonullox Mutal “Paxtakor” jamoasining marhum futbolchilari haqidagi oʻzining sheʼriy bagʻishlovlari bilan tanishtirdi. Shoira Zulfiya Moʻminova “Samoga sochilgan yulduzlar” risolasini vatanimizning ana shunday azamat sportchilari hayotiga bagʻishlab yozganini taʼkidlab, ulardan namunalar oʻqidi. Marhum paxtakorchilarning har biri haqida asotirlar oʻqilib, ashʼorlar aytildi.

Axbor Imomxoʻjayev oʻzining koʻp yillik tinimsiz izlanishlari natijasi yozilgan va endigina nashr etilgan “Asr futbolidagi asl qadrdonlarim” nomli 800 betlik noyob hujjatlar va fotolavhalarga toʻla tarixiy ensiklopedik asarini hamda boshqa Oʻzbekiston futboli tarixiga bagʻishlangan qator kitoblarini JIDU kutubxonasiga taqdim etdi.   

Jahon iqtisodiyoti va diplomatiya universitetida “Yevropa tillari haftaligi” doirasida oʻtkazilgan sport tadbirlari talaba-yoshlar uchun sport faxriylari tomonidan berilgan ibratli voqealar, boy hayotiy tajriba, betakror mahorat darsiga aylandi.

---

2019 йил 24 апрель куни Жаҳон  иқтисодиёти ва дипломатия университетида «Европа тиллари ҳафталиги» доирасида талабалар ва университет қошидаги академик лицей ўқувчилари иштирокидаги анъанавий «Европа футболи» турнирининг финал учрашуви бўлиб ўтди.

Катта қизиқиш уйғотган халқаро мусобақанинг якуний босқичига махсус таклиф қилинган футбол бўйича Халқаро тоифадаги ҳакам, Ўзбекистонда хизмат кўрсатган ёшлар мураббийси Ахбор Имомхўжаев ҳамда FIFA рефериси, беш марта Осиёнинг энг яхши ҳаками унвонига эришган Равшан Эрматов ҳакамлик қилдилар.

Кўплаб тамошабинларнинг қарсаклари остида рамзий халқаро ўйин иштирокчилари – ЖИДУ ва унинг қошидаги Лицей талабалари «Борусия» (Дортмунд) ва «Бавария» (Мюнхен) жамоаларининг айни уларга хос спорт кийимларида майдонга тушдилар.

Мусобақани Ўзбекистон давлат мадҳияси янграгач, «Пахтакор» командасининг машҳур футбол фахрийси Аҳмад Убайдуллаев биринчи тўпни тепиш билан бошлаб берди. «Борусия» жамоаси сардори Д.Баходиров бошчилигидаги ўйинчилар – И.Ибрагимов, В.Мирзарахимов, М.Жумагулов, О.Абдулхаков, Ш.Сирожов «Бавария» жамоаси: С.Жўрақўзиев бошчилигидаги С.Тўраев, Ш.Жуманов, Б.Аймуратов, Б.Жониев, Ж.Кадировларга қарши дарҳол ҳужум бошладилар. Тинимсиз кураш 3:1 ҳисоб билан якунланиб, «Борусия» жамоаси фойдасига ҳал бўлди. Ғолиблар ва турнир иштирокчиларини Ахбор Имомхўжаев, Равшан Эрматов, Ўзбекистон футболи фахрийлари Вячеслав Солохо, Аҳмад Убайдуллаев махсус кубок ҳамда медаллар билан тақдирладилар.

Мазкур тадбир доирасида Ўзбекистон жисмоний маданиятининг йирик арбобларидан ҳисобланган Ахбор Имомхўжаев таваллудининг 1000 ойлиги тантанали нишонланди. Мўътабар устозни республикамизда спорт тараққиётига катта ҳисса қўшиб келаёган таниқли ташкилотчилардан Шавкат Тўлаганов, Ўзбекистонда хизмат кўрсатган артист Козим Қаюмов, ЖИДУ биринчи проректори Матёқуб Бақоев ва бошқалар қизғин табриклаб, унга энг самимий истакларини билдирдилар. Учрашувда тажрибали футбол тренери Бахром Ғафуров, спорт журналисти Салоҳиддин Маҳмудов, «Олтин қалам» Республика танлови лауреати, таниқли шоира Зулфия Мўминова, тарихчи олим, шоир ва жамоат арбоби Омонуллох Мутал ва бошқалар иштирок этдилар.

Спорт байрами доирасида меҳмонлар ва университет талаба-ёшлари орасида Ўзбекистонда жисмоний маданият тараққиётида бўлаётган катта ўзгаришлар ва ҳал қилиниши лозим бўлган муаммолари бўйича ҳам очиқ мулоқот бўлиб ўтди. Таниқли спорт вакиллари талабаларнинг кўплаб саволларига жавоб бердилар. 

Очиқ мулоқотда 9 май – «Хотира ва қадрлаш куни» олдидан бундан қирқ йил олдин авиаҳалокатга учраган «Пахтакор» жамоаси футболчилари эсланиб, уларнинг ёрқин хотираси халқимиз қалбида абадий сақланиши алоҳида қайд этилди. Шоир Омонуллох Мутал «Пахтакор» жамоасининг марҳум футболчилари ҳақидаги ўзининг шеърий бағишловлари билан таништирди. Шоира Зулфия Мўминова «Самога сочилган юлдузлар» рисоласини ватанимизнинг ана шундай азамат спортчилари ҳаётига бағишлаб ёзганини таъкидлаб, улардан намуналар ўқиди. Марҳум пахтакорчиларнинг ҳар бири ҳақида асотирлар ўқилиб, ашъорлар айтилди.

Ахбор Имомхўжаев ўзининг кўп йиллик тинимсиз изланишлари натижаси ёзилган ва эндигина нашр этилган «Аср футболидаги асл қадрдонларим» номли 800 бетлик ноёб ҳужжатлар ва фотолавҳаларга тўла тарихий энциклопедик асарини ҳамда бошқа Ўзбекистон футболи тарихига бағишланган қатор китобларини ЖИДУ кутубхонасига тақдим этди.   

Жаҳон иқтисодиёти ва дипломатия университетида «Европа тиллари ҳафталиги» доирасида ўтказилган спорт тадбирлари талаба-ёшлар учун спорт фахрийлари томонидан берилган ибратли воқеалар, бой ҳаётий тажриба, бетакрор маҳорат дарсига айланди.